منتديات مضايف بلدة الغبره - عرض مشاركة واحدة

9th April 2011

متى تجي يازين راضـي ومرضيـن = وانسى هموم الي مضـن واتلفنـي
اجلس معك يازين ساعـه واثنتيـن = واخبـرك بعلومـي اللـي مضنـي
انا اشهد انك ياهوى البـال مشقيـن = حبـك ملكنـي يالحبيـب وسجنـي
لعل عقب النـوح وافـراق الاثنيـن = تضحك لي الايام واضحـك بسنـي
لاشك انا في وين وصويحبي ويـن = ولايبـري الوجعـان كثـر التمنـي
يانـور عينـي يابعـد كـل غاليـن = عنـك الضبـاء يازيـن مايجفلنـي
حيثك غزال مثلهـن يكحـل العيـن = كامـل مكمـل بالـحـلا مثلهـنـي
الخـد وردي والحـلا بالشفتـيـن = سود هـدب عينـه اليـا سلهمنـي
يازين شفت رمـاح نـاس مغيريـن = بعيونـك الـصـدرات لاسلهمـنـي
يازين شفت الموت بين الحجاجيـن = في مقـرن الحجـه مدافـع رمنـي
في عينه اليمنى من العسكر الفيـن = تطـاردو بالخيـل ليـن اتعبـنـي
وفي عينه اليسرى غروس وبساتين = وعيـون زرق بانـخـل فجـرنـي
خليت نفسـي فيـك دايـم تمنيـن = ماقوى العزا لـو السنيـن اطولنـي
لاانتي نعشتينـي ولانتـي ذبحتيـن = لاحـي لاميـت وانــا بينهـنـي
يدري وانا ادري جمله الناس ميتيـن = ماباقـي كـود الهـوى والهبـنـي
ونيت ونه جـض منهـا الثقيليـن = منها معاليـق الضميـر اصرمنـي
وياراكبٍ من فوق خمـس وثمانيـن = حيلـن عليهـن الشحـوم متبنـي
خمـسٍ نـصن ديـار الضعيفيـن = العاهل اللـي مـن نصـاه متعنـي
وخمسٍ نصن حايل بـلاد الكريميـن = مرن علىبن حمـود فـي دربهنـي
وخمسٍ على العجمان هم والقحاطين = داجـن مطيـر ولالقـن وارجعنـي
وخمسٍ مع الصمان مثل الشياهيـن = داجـن ولاجـن ومالقنـه وجـنـي
وخمسٍ تنصن هجر وبهجر نعميـن = دارن وللدمـام صـبـح اشملـنـي
وخمسٍ نصن سدير عدل الموازيـن = ماحصلـن اللـي يبـن وعبـرنـي
وخمسٍ نص عين ابن قنور بالعيـن = ورد على عيـن الهنـاء واشربنـي
وخمس بعفيف وبالمويـه متمسيـن = الله يسـاعـد جيشـنـا غربـنـي
وخمسٍ على الطايف براد وبساتيـن = دار المصيـف المشتهـر دورنــي
وخمسٍ نصن جده على ساحل زيـن = داجـن علـى سيـف البحرمالقنـي
وخمس تنصـن المدينـه وعجليـن = وصلـن طيبـة مالقـن مابغـنـي
وخمسٍ نص الرس بالرس فرحيـن = دار السعـاده ملـقـن وانشـدنـي
وخمسٍ تنصن ديره غرب طعسيـن = في كـل طعـس مرتفـع ينشدنـي
وخمسٍ مع الوادي سواه السراحيـن = تنشـدن ليـن اتعـب واجلسـنـي
وخمسٍ نصن بريدة ولالقـو شيـن = يوميـن ببريـده وهـن يدلجـنـي
وخمسٍ نصن عنيزه وبـه مقيميـن = عنـد الغزيليـه لـمـا صـدرنـي
تلافـن الخمـس وجـن الثمانيـن = جـن الركايـب كلهـن وافلسـنـي
ولالقـن الـي طعنـي برمحـيـن = جـن الركـاب ركابهـن يلعبـنـي
قم يانديبي وارتحـل فـوق بقسيـن = بالـزيـت والبنـزيـن كملتهـنـي
واحد نصا دربه ويمشـي بالهويـن = عسـاه يلقـى واحـد قـد محنـي
وبقسٍ به المعروف والعرف هاديـن = يدوربـه السـواق بـكـل فـنـي
يمشيبه السواق من بيـن سوقيـن = وقـف ولمبـات الخطـر ولعـنـي
راح بخفـا وعـداه مهـب داريـن = ساعه وجاني فـي حبيبـي مثنـي
انا عشيرك بالهوى كيـف تنسيـن = نسيتنـي يازيـن واقفيـت عـنـي
انا احسـب صافـي لـي مصافيـه = ووجـودك ايـام السعـد يكملـنـي
لاصرت ماتقدر من عـداك ترضيـن = ارسل خبر وش صار لجل اطمانـي
ماغيـرك احـدٍ ياحبيبـي يسليـن = اكبر مصيبـه غيبتـك يـوم عنـي
أثر حبيبي دونـه امـر الحسوديـن = حـدب الظهـور وجعلهـن يتلفنـي
الله بصيـر وجـامـعٍ الشيتيتـيـن = مـن بعـد مالحسادظنـه يظـنـي
همـن ركبنـا بقسنـا مستلـذيـن = عسى عـداي عيونهـم يفضخنـي
اهـلا هلابـك عـد نـاس مقيميـن = واعداد بوش البدو يـوم اسرحنـي
وعد النخل والخوخ والليـم والتيـن = وعـد الجريـد وعـدة اوراقهـنـي
وعداد من حجو من البعـد عانيـن = وعـدى الفـدى وعـداد مايذبحنـي
وعدة حصا من فوق روس الشياطين = واهـلا هلابـك عــد مايحذفـنـي
واعداد مانبـت الـورق بالبساتيـن = واهـلا هلابـك عـد مايزهـرنـي
واعداد مانبت الشجـر بالحياطيـن = واهـلا هلابـك عــد مايطلعـنـي
واهلا هلابك عـد حـب الرماميـن = وعـد الـورق واعـداد مايشربنـي
واهلا هلابك عـد ماترمـش العيـن = وحتـى المسامـع عـد مايسمعنـي
واعـداد محـار طلعبيـن غيصيـن = واهـلا هلابـك عــد مايفلقـنـي
واعداد مابالسوق من موتـر زيـن = واداد مــادار الكـفـر لامشـنـي
وعد الكواكب مع حجار الضلاعيـن = واعـداد ورق باللحـن غرهـدنـي
مانسآك لين الاثـل يطلـع لواميـن = وليـن الجبـال الرسيـات يحكنـي
يـارب تهديلـي حبيبـي وتهديـن = وانسى غرابيـل مضـن وادرسنـي
الله يجيـب الزيـن ويثبـت الديـن = ويحطـم جيـوش العـدو لاقبلنـي
واختم جوابـي والقصيـدة تسليـن = لـو ماتفيـد تخفـف الهـم عنـي
وصلو على المختار سيـد النبييـن = عـد الحـروف وعـد مايكتبـنـي

اللهم ارحــــمه واغفر له

قصيده راائعه جدااا اختصرتهاا لطولهااا واتمني تعجبكم واراائكم هدفناا

المصدر: منتديات مضايف بلدة الغبره

rwd]i ggahuv ti] vpli hggi v,,,ui hggi vpli